ஹட்டன் டிப்போ இம்முறை தீபாவளி வருமானமாக ஒரு கோடியே 10 லட்சம் ரூபா பெற்றுள்ளதாக அதன் முகாமையாளர் தெரிவித்துள்ளார்.
தீபத்திருநாளை கொண்டாடுவதற்காக பெரும் எண்ணிக்கையிலான மக்கள் ஹட்டனை நோக்கி வருகை தந்திருந்தனர்.
இதனால் விசேட பஸ் சேவைகள் ஹட்டனிலிருந்து மலையக நகரங்களுக்கும், தலைநகரத்திற்கும் ஈடுபடுத்தப்பட்டிருந்தன.
இந்நிலையில் கடந்த 27 ஆம் திகதி தொடக்கம் நேற்று (31) வரை மேற்குறிப்பிட்ட வருமானத்தினை ஈட்டியுள்ளதாக தெரிவித்தார்.
எனினும் கடந்த வருட தீபாவளியினை ஒப்பிடும் போது இம்முறை வருமானம் குறைந்துள்ளதாகவும் அதற்கு காரணம் கொழும்பிலிருந்து ஏனைய காலங்களில் வந்த அளவுக்கு இம்முறை வருகை தரவில்லை என்றும் பஸ் கட்டணம் குறைக்கப்பட்டமையும் காரணம் எனவும் அவர் இதன் போது சுட்டிக் காட்டினார்.
இதன் அடிப்படையில் கடந்த 27 ஆம் திகதி 2,679,384 ரூபாவும், 28 ஆம் திகதி 2,929,280 ரூபாவும், 29 ஆம் திகதி 3,377,102 ரூபாவும், 30 ஆம் திகதி 3,471,211 ரூபாவும், நேற்று 3,979,812 ரூபா வருமானமாகவும் பெற்றுள்ளமையும் குறிப்பிடத்தக்கது.
